Kim deyir ki, öldü Şəhid (Şeir)

Bəsirətlə baxan, görən

Pak-pakizə ömür sürən,

Mənəviyyat ətri verən

Heç solmayan güldü Şəhid.

 

Getdi nəfsi ram olmaqçün,

Qaranlığa şam olmaqçün,

Həyatımız tam olmaqçün

Həyatını böldü Şəhid.

 

Məzar üstə çiçəklər də..

Daim arzu –diləklərdə

Yaşayırsa ürəklərdə

Kim deyir ki, öldü Şəhid.

 

Mələk onu öyə-öyə

Sevinc sığmır yerə-göyə

Allaha qovuşur deyə

Əcəlinə güldü Şəhid.

 

Müəllif: Eldar İlqaroğlu

Şərh yaz