Bakı şəhidlərini anmağa hazırlaşır – FOTO

20 Yanvar faciəsinin 28-ci ildönümü ilə əlaqədar Şəhidlər xiyabanında görülən hazırlıq işləri yekunlaşmaq üzrədir.

Hazırlıq işləri 3 gün əvvəl başlayıb və bu gün yekunlaşdırılması planlaşdırılır.
Xiyabanda işləyən şəxslərin dediyinə görə, bu il Şəhidlər xiyabanında istifadə olunan qərənfillərin sayı ötən illərdən daha çoxdur.
Artıq insanlar Şəhidlər xiyabanını ziyarət etməyə başlayıblar. Onların arasında müəllimlər, gənclər, orta məktəb şagirdləri də vardı. Onlar şəhidlərin qəbirlərini ziyarət edir, məzarları üzərinə qərənfillər qoyur, şəhidlərə aid şeirlər deyirlər.
Qeyd edək ki, 1990-ci il yanvarın 19-dan 20-nə keçən gecə keçmiş sovet dövlətinin hərb maşını həm quru, həm də dəniz yolu ilə Bakı şəhərinə həmlə edərək görünməmiş qəddarlıqla keçirilən cəza tədbirlərinə imza atıb. Bu hadisə nəticəsində heç bir günahı olmayan 133 dinc sakin öldürülüb, 744 nəfər yaralanıb, 841 nəfər qanunsuz həbs olunub. Həlak olanlar arasında yetkinlik yaşına çatmayanlar, qadınlar və qocalar da var idi. SSRİ prezidenti Mixail Qorbaçovun göstərişi ilə Sovet ordusunun həmin gün Azərbaycan xalqına qarşı həyata keçirdiyi vəhşi terror aktı insanlığa qarşı törədilmiş ən ağır cinayətlərdən biri kimi bəşər tarixinə qara hərflərlə yazılıb.

Mənbə: Report

Şərh yaz